Toshkent shahridagi Puchon universiteti va Gyeongsang Global Talent Center talabalar va bitiruvchilar uchun xalqaro karyera imkoniyatlarini rivojlantirishga qaratilgan hamkorlik memorandumini imzoladilar. Ushbu hujjat Koreya Respublikasida ishga joylashish va professional o‘sish uchun yangi istiqbollarni ochadi.
Toshkent shahridagi Puchon universiteti Koreya Respublikasining Kyonson-Pukto (Gyeongsangbuk-do) provinsiyasidagi Gyeongbuk Technopark bilan hamkorlikda faoliyat yurituvchi Gyeongsang Global Talent Center bilan o‘zaro anglashuv memorandumini imzoladi. Mazkur kelishuv kadrlar tayyorlash va yosh mutaxassislarni ish bilan ta’minlash sohasida hamkorlikni mustahkamlashga qaratilgan.
Memorandumning asosiy maqsadi Toshkent shahridagi Puchon universiteti talabalari va bitiruvchilarini karyera rivoji hamda xalqaro mehnat bozoriga, jumladan Janubiy Koreya mehnat bozoriga chiqish jarayonida qo‘llab-quvvatlashdan iborat. Hamkorlik universitet va koreys kompaniyalari o‘rtasida samarali hamkorlik mexanizmlarini yaratishga yo‘naltirilgan.
Memorandum doirasida tomonlar quyidagilarni rejalashtirmoqda:
- Kyonson-Pukto provinsiyasidagi kompaniyalarda malakali mutaxassislarni ishga joylashtirishga ko‘maklashish;
- kadrlar ehtiyoji va mavjud bo‘sh ish o‘rinlari haqida axborot almashish;
- karyera bo‘yicha maslahatlar va axborot tadbirlarini tashkil etish;
- yosh mutaxassislarning professional rivojlanishini qo‘llab-quvvatlash.
Memorandumning imzolanishi Toshkent shahridagi Puchon universitetining xalqaro hamkorlikni rivojlantirish hamda talabalar va bitiruvchilar uchun professional o‘zini namoyon etish imkoniyatlarini kengaytirishga intilishini tasdiqlaydi.
