Bilim sari — Oʻzbekistonga, tajriba sari — Toshkentga, yangi professional ufqlar sari — Puchon universitetiga. Bu yerda amaliyotga yoʻnaltirilgan taʼlim, innovatsion metodlar va xalqaro muhit birlashib, talabalarga real kasbiy oʻsish imkonini yaratadi. Shu bois Qozogʻiston Milliy ayollar pedagogika universiteti magistrantlari “Maktabgacha taʼlim” yoʻnalishidagi akademik amaliyot uchun aynan Toshkent shahridagi Puchon universitetini tanladilar.
Dastur talabalarga ilgʻor pedagogik amaliyotlar, zamonaviy tadqiqotlar va universitetning elektron resurslari bilan bevosita tanishish imkonini berdi. Ishtirokchilar intensiv darslar, master-klasslar, ochiq mashgʻulotlar va professor-oʻqituvchilar bilan muloqot jarayonlarida faol qatnashdilar.
Stajirovkaning asosiy eʼtibori bolalar rivojiga oid innovatsion metodlar, ijodiy taʼlim muhiti va raqamli texnologiyalarni pedagogik jarayonga tatbiq etishga qaratildi. Darslarni ichkaridan kuzatish, savollar berish va real holatlarni muhokama qilish magistrantlarga amaliy tajriba toʻplashda katta yordam berdi.
Akademik mobillik dasturi ikki oliy taʼlim muassasasi hamkorligini mustahkamlab, ishtirokchilarga yangi gʻoya va tadqiqotlarga ilhom berdi.
Toshkent shahridagi Puchon universiteti oʻz bilimini oshirish, oʻsish va zamonaviy taʼlim bilan tanishishni istagan har bir inson uchun doimo ochiq.