Toshkent shahridagi Puchon Universitetida litsey o‘quvchilari uchun Prezidentning tegishli farmoni ijrosi doirasida “Giyohvandlik – asr vabosi” nomli profilaktik tadbir o‘tkazildi. Tadbirning asosiy maqsadi — yoshlarni narkotik moddalarni iste’mol qilish bilan bog‘liq real xavf-xatarlar haqida ochiq, sodda va tushunarli tarzda ogohlantirish, ularda sog‘lom va xavfsiz kelajak sari ongli tanlov qilish madaniyatini shakllantirishdan iborat.
Uchrashuvda universitetning profilaktika katta inspektori, mayor G.M.Abdurahmonov so‘zga chiqdi. Ta’kidlanganidek, bugungi kunda narkomaniyaga qarshi kurash bo‘yicha davlat siyosatining asosiy yo‘nalishi — yosh avlod salomatligini himoya qilish, erta profilaktika tizimini samarali tashkil etish va xavfli muhitga kirib qolishning oldini olishdir. Mayorning qayd etishicha, o‘z vaqtida o‘tkazilgan tushuntirish ishlari, ochiq muloqot va ishonchli muhit yoshlarning to‘g‘ri hayotiy pozitsiyasini shakllantirishda hal qiluvchi ahamiyatga ega.
Tadbir davomida o‘quvchilar faol ishtirok etib, narkotik moddalarni iste’mol qilish yoki saqlashning huquqiy oqibatlari haqida savollar berdilar. Shuningdek, xavfli vaziyatlarni qanday aniqlash va zarurat tug‘ilganda qaysi idoralarga murojaat qilish mumkinligi yuzasidan ham fikr almashildi. Bunday jonli muloqot mavzuning ijtimoiy-huquqiy jihatlarini yoritish bilan birga, uni o‘quvchilar uchun yanada tushunarli va hayotga yaqin bo‘lishiga xizmat qildi.
Uchrashuv yakunida muntazam profilaktik tadbirlarni tashkil etish, ta’lim muassasalari bilan hamkorlikni kuchaytirish va yoshlarning faol fuqarolik pozitsiyasi jamiyatda sog‘lom, mas’uliyatli va xavfsiz muhitni shakllantirishning eng muhim omillari ekani alohida ta’kidlandi.
