Xotira, tarix va insoniy qadriyatlar — har bir millat ongining poydevoridir. Ular orqali jamiyat bosib o‘tgan yo‘l anglanadi, avlodlar o‘rtasidagi bog‘liqlik saqlanib qoladi. Toshkent shahridagi Puchon universiteti Elektron biznes kafedrasi talabalari “Shahidlar xiyoboni” xotira majmuasi hamda “Siyosiy tazyiq qurbonlari xotirasi muzeyi”ni ziyorat qilib, tarixning fojeali sahifalarini chuqurroq anglash va insoniy qadriyatlarning ahamiyatini his etish imkoniga ega bo‘ldilar. Bu madaniy-ma’rifiy tadbir universitetning tarbiyaviy dasturi doirasida tashkil etilib, ishtirokchilarga tinchlik va adolat asosida kelajak qurish uchun o‘tmishni xotirlash naqadar muhim ekanini yana bir bor eslatdi.
Tadbarda guruh kuratori va Elektron biznes kafedrasi o‘qituvchisi Razakov Farrux, shuningdek, yoshlar va talabalar bilan ishlash bo‘yicha prorektor Churbanov Igor Aleksandrovich ishtirok etdilar.
Muzeyga tashrif talabalarga O‘zbekiston XX asr tarixidagi og‘ir davrlarni chuqurroq tushunish imkonini berdi. Ekskursovodlar siyosiy tazyiq qurbonlarining taqdiri haqida so‘zlab berdilar, arxiv hujjatlari, suratlar va o‘sha davrga oid shaxsiy buyumlarni namoyish etdilar. Muzey ekspozitsiyasi talabalarda kuchli taassurot qoldirib, ularni erkinlik, adolat va inson qadr-qimmati haqida o‘ylashga undadi.
Tashrifdan so‘ng talabalar o‘qituvchilari bilan ko‘rgan-bilganlarini muhokama qildilar. Ko‘pchilik bu kabi tadbirlar nafaqat tarixiy ma’lumot olish, balki o‘z yurtining o‘tmishi bilan ma’naviy bog‘lanish imkonini berishini ta’kidladilar. “Jonli tarix” yoshlar ongiga zamonaviy qadriyatlarga boshqacha nigoh bilan qarash, tinchlik va barqaror hayotning qadrini chuqur anglashga yordam beradi.
Kurator Razakov Farrux ta’kidlashicha, tarbiyaviy ish Puchon universitetining ta’lim jarayonida muhim o‘rin tutadi. Uning fikricha, bunday tashriflar talabalar qalbida tarixga hurmat tuyg‘usini shakllantiradi, ma’naviy va axloqiy fazilatlarni rivojlantiradi hamda milliy o‘zlikni mustahkamlaydi.
Yoshlar va talabalar bilan ishlash bo‘yicha prorektor Churbanov Igor Aleksandrovich esa bunday tadbirlar talabalarni birlashtirish, faol fuqarolik pozitsiyasini shakllantirish va tarixiy voqealarga tanqidiy yondashish qobiliyatini rivojlantirishga xizmat qilishini qayd etdi.
Tashrif yakunida ishtirokchilar tashkilotchilar va universitet rahbariyatiga yurtimiz tarixini yanada chuqurroq anglash imkonini yaratgani uchun minnatdorlik bildirdilar. Bu kun talabalar uchun nafaqat darsdan tashqari faoliyat, balki shaxsiy va ma’naviy o‘sish bosqichi bo‘ldi.
“Shahidlar xiyoboni” xotira majmuasi va “Siyosiy tazyiq qurbonlari xotirasi muzeyi”ga uyushtirilgan tashrif talabalar qalbida chuqur iz qoldirdi va o‘tmishni xotirlash — bu nafaqat tarix, balki kelajak uchun muhim saboq ekanini yana bir bor yodga soldi.
