Toshkentdagi Puchon universiteti vakillari Surxondaryo va Qashqadaryo viloyatlaridagi pedagogika texnikumlariga bir qator amaliy tashriflar uyushtirdilar. Mazkur tashriflarning asosiy maqsadi — ta’lim sohasida xalqaro hamkorlikni rivojlantirish, ilg‘or tajribalarni almashish va bo‘lajak pedagoglarni tayyorlash samaradorligini oshirishdan iborat bo‘ldi.
Uch kun davomida — 30, 31 oktyabr va 1 noyabr kunlari — Puchon universiteti delegatsiyasi “Maktabgacha ta’lim tashkilotlari uslubchisi” yo‘nalishida yo‘lga qo‘yilgan o‘quv jarayoni bilan tanishdi. Universitet xodimlari texnikumlarda joriy etilgan xalqaro ta’lim dasturlarini o‘rganib, ularni yanada takomillashtirish imkoniyatlarini muhokama qildilar.
Tashrif davomida o‘quv-uslubiy ishlar sifati alohida e’tiborda bo‘ldi. Texnikum o‘qituvchilari har bir fan moduli bo‘yicha ishlab chiqilgan silabuslarni taqdim etdilar, Puchon universiteti mutaxassislari esa ularni zamonaviy ta’lim standartlariga moslashtirish bo‘yicha tavsiyalar berdilar.
Amaliy tashriflarning muhim qismi sifatida talaba va o‘qituvchilar ishtirokida seminarlar tashkil etildi. Unda Toshkentdagi Puchon universitetining faoliyati, xalqaro loyihalari va qo‘shma ta’lim tashabbuslari muhokama qilindi. Bunday ochiq muloqot hamkorlikni yanada mustahkamlash va uzoq muddatli aloqalarni rivojlantirishga zamin yaratdi.
Tashrif doirasida, shuningdek, pedagog kadrlar uchun ko‘chma malaka oshirish tizimini yo‘lga qo‘yish imkoniyatlari ham ko‘rib chiqildi. Delegatsiya texnikumlarning moddiy-texnik bazasi, o‘quv kurslarini o‘tkazish sharoitlari va pedagoglarning salohiyati bilan tanishdi.
Puchon universiteti va pedagogika texnikumlari o‘rtasidagi hamkorlik nafaqat tajriba almashishga, balki ilmiy-amaliy va o‘quv-uslubiy salohiyatni rivojlantirishga ham qaratilgan bo‘lib, bu ta’lim sifati hamda malakali mutaxassislar tayyorlash darajasini oshirishga xizmat qiladi.
Ma’lumot uchun:
Toshkentdagi Puchon universiteti O‘zbekistonda zamonaviy ta’lim muhitini rivojlantirish, xalqaro ta’lim standartlarini joriy etish, ilmiy-amaliy hamkorlikni kengaytirish hamda malakali kadrlar tayyorlash sifatini oshirish yo‘nalishida bir qator loyihalarni amalga oshirib kelmoqda.
