Toshkent shahridagi Puchon Universitetida litsey o‘quvchilari uchun Prezidentning tegishli farmoni ijrosi doirasida “Giyohvandlik asr vabosi” nomli profilaktik tadbir o‘tkazildi. Tadbirning maqsadi yoshlar uchun narkotik moddalarni iste’mol qilish bilan bog‘liq real xatarlarni ochiq, sodda va tushunarli tarzda tushuntirish hamda ularni sog‘lom va xavfsiz kelajak yo‘lida ongli tanlov qilishga undashdan iborat.
Uchrashuvda universitet profilaktika katta inspektori, mayor G. M. Abdurahmonov so‘zga chiqdi. Ta’kidlanganidek, bugungi kunda narkomaniyaga qarshi kurash bo‘yicha davlat siyosati avvalo yosh avlod salomatligini himoya qilish va erta profilaktika tizimini samarali tashkil etishga qaratilgan. Mayor, aynan o‘z vaqtida o‘tkazilgan tushuntirish ishlari, ochiq muloqot va ishonchli muhit yoshlarning to‘g‘ri hayotiy qarashlarini shakllantirishga, shuningdek, ularni har qanday noqonuniy narkotik muhitga jalb etilishining oldini olishga xizmat qilishini qayd etdi.
Tadbir davomida o‘quvchilar savollar berib, narkotik moddalarni iste’mol qilish va saqlashning huquqiy oqibatlari bilan qiziqdilar, shuningdek, xavfli vaziyatlarni vaqtida aniqlash va yordam uchun qayerga murojaat qilish mumkinligi yuzasidan suhbatlashdilar. Bunday jonli muloqot shakli muhim ijtimoiy-huquqiy jihatlarni yoritish bilan birga, mavzuni o‘quvchilar uchun yanada yaqin va tushunarli bo‘lishiga xizmat qildi.
Uchrashuv yakunida muntazam profilaktik tadbirlar, ta’lim muassasalari ko‘magi va yoshlarning faol fuqarolik pozitsiyasi jamiyatda sog‘lom, mas’uliyatli va xavfsiz muhitni shakllantirishning eng muhim omillari ekani ta’kidlab o‘tildi.
