Kamerangizni QR-kodga yo‘naltiring — va qadimiy obidalar o‘z tarixini sizga so‘zlab beradi. Ilovani oching — farzandingiz bog‘chada kunni qanday o‘tkazganini bilib olasiz. Sun’iy intellekt esa bolajonga multfilmlar, kitoblar va qisqa interaktiv darslar orqali atrofdagi olamni qiziqarli tarzda o‘rganishga yordam beradi.
Bu chiroyli taqdimotlardagi g‘oyalar emas. Bular Puchon universitetining Toshkentdagi filialida tahsil olayotgan talabalar yaratgan startaplardir. Eng muhimi, ularning ayrimlari allaqachon amalda ishlamoqda.
Masalan, Startup HUB BUT 2026 universitetlararo startaplar tanlovi g‘olibi bo‘lgan QRTIFACT loyihasi O‘zbekistonning madaniy merosiga mutlaqo yangi nigoh bilan qarashni taklif etadi. Tarixiy obida yoniga o‘rnatilgan QR-kodni smartfon orqali skaner qilish kifoya — bir necha soniya ichida obida haqidagi tarixiy ma’lumotlar, qiziqarli faktlar va tavsiflardan iborat raqamli gid ochiladi.
Eng muhimi, loyiha universitet devorlaridan chiqib, amaliyotga joriy etilgan. Bugungi kunda tizim Sirdaryo viloyati va Buxoro shahrida muvaffaqiyatli ishlamoqda. Yaqin istiqbolda esa loyiha Xiva va Samarqand shaharlarida ham ishga tushirilishi rejalashtirilgan. Bu endi oddiy o‘quv loyihasi emas, balki O‘zbekiston bo‘ylab sayohatlarni yanada zamonaviy, qulay va qiziqarli qilayotgan haqiqiy raqamli mahsulotdir.
Ana shunday innovatsion g‘oyalar Puchon universitetining Toshkentdagi filialida bo‘lib o‘tgan Startup HUB BUT 2026 universitetlararo startaplar tanlovining asosiy mavzusiga aylandi. Tanlov mamlakatimizning yetakchi oliy ta’lim muassasalaridan eng istiqbolli talabalar jamoalarini bir maydonga jamladi.
Unda Puchon universitetining Toshkentdagi filiali, Inha universiteti, Xalqaro Vestminster universiteti hamda Boston universiteti talabalari o‘z loyihalarini taqdim etdilar. To‘qqizta jamoa ta’lim, raqamli texnologiyalar, sun’iy intellekt, turizm va ijtimoiy xizmatlar yo‘nalishlarida innovatsion yechimlarni namoyish etib, O‘zbekiston yoshlari nafaqat qiziqarli g‘oyalarni ilgari surishi, balki amaliy foyda keltiradigan loyihalarni ham yaratishga qodir ekanini yana bir bor isbotladi.
Tanlovning o‘ziga xos jihati faqat kuchli loyihalar bilangina cheklanib qolmadi.
Ishtirokchilar ishlariga bahoni professor-o‘qituvchilar emas, balki yirik biznes vakillari, investorlar va istiqbolli startaplarni rivojlantirish bo‘yicha katta tajribaga ega mutaxassislar berdilar. Ular bozorda muvaffaqiyat qozonadigan loyihalarni qanday aniqlashni yaxshi biladigan professional ekspertlardir.
Ekspertlar hay’ati tarkibidan DK-LOK Corporation kompaniyasi vakolatxonasi rahbari Valeriy Kim, Transasia Logistics Group asoschisi va bosh direktori Vyacheslav Kim, UGMK hamda TMX kompaniyalarining Markaziy va Janubi-Sharqiy Osiyo bo‘yicha vitse-prezidenti Valeriy Kim, moliya direktori Anna Kim, DATAVOLT IT PARK DATA CENTER kompaniyasi loyiha boshqaruvi mutaxassisi Galina Pan, Transasia Logistics Group HR-direktori Yuliya Tyo, KORYOIN Biznes klubi raisi Yanis Li, Eriell Oilfield Services Middle East DMCC dasturchisi Roman Kan, moliyachi Alisa Raxmatulina, KODEXX kompaniyasi direktori Aleksandr Pak, investor va KORYOIN Biznes klubi moliya qo‘mitasi raisi Andrey Kim hamda raqamli kommunikatsiyalar mutaxassisi Alisa Muslimova o‘rin oldilar.
Aynan ushbu kompaniyalar tanlovning hamkorlari sifatida uni tashkiliy va moliyaviy jihatdan qo‘llab-quvvatladilar. Talabalar uchun esa bu oddiy tanlovdan ko‘ra ancha muhimroq imkoniyat bo‘ldi — ular o‘z loyihalarini startaplarni haqiqiy biznesga aylantirishga qodir bo‘lgan insonlarga taqdim etish imkoniga ega bo‘ldilar.
Tanlovni ochib berar ekan, Puchon universitetining Toshkentdagi filiali yoshlar masalalari, fan va innovatsiyalar bo‘yicha birinchi prorektori Kamola Jumayevna Riskulova talabalar tadbirkorligini rivojlantirish va iste’dodli g‘oyalarni amaliy loyihalarga aylantirish uchun zarur sharoit yaratish muhimligini ta’kidladi. Shuningdek, KORYOIN Biznes klubi raisi Yanis Li ham so‘zga chiqib, universitetlar va biznes o‘rtasidagi hamkorlik innovatsion ekotizimni rivojlantirishda muhim o‘rin tutishini qayd etdi.
Tanlov yakunlariga ko‘ra, uchta sovrinli o‘rindan ikkitasi Puchon universitetining Toshkentdagi filiali talabalari hissasiga to‘g‘ri keldi.
Birinchi o‘rin va 20 million so‘mlik bosh mukofotni Axborot texnologiyalari kafedrasi talabasi Fayzulla Yadgorov boshchiligidagi QRTIFACT jamoasi qo‘lga kiritdi. Loyiha bugunoq zamonaviy raqamli texnologiyalar yordamida O‘zbekistonning tarixiy shaharlaridagi turizm salohiyatini yanada keng ochishga xizmat qilmoqda.
Ikkinchi o‘rinni Boston universiteti talabasi Natalya Pronina taqdim etgan Prep Verce loyihasi egalladi. Mazkur ishlanma oliy ta’lim muassasalariga hujjat topshirish va ariza berish jarayonini sezilarli darajada soddalashtirishga xizmat qiladi.
Uchinchi o‘rin esa “Maktabgacha ta’lim” yo‘nalishi talabasi Ozoda Chiroy tomonidan ishlab chiqilgan Bolajon Kids loyihasiga nasib etdi.
Mazkur mobil ilova ota-onalar va tarbiyachilar o‘rtasidagi muloqotni yanada ochiq va qulay qiladi. Ota-onalar farzandining kun davomida nimalar bilan shug‘ullangani, qanday mashg‘ulotlarda qatnashgani, nimalarni o‘rgangani, qobiliyatlari qanday rivojlanayotgani va bog‘chaga moslashuv jarayoni haqida doimiy ma’lumot olib borish imkoniyatiga ega bo‘ladilar.
Har bir loyiha ortida oylar davom etgan izlanishlar, jamoaviy mehnat va yuzlab muhokamalar turibdi. Innovatsiyalar aynan shunday — nazariyada emas, amaliyotda yaratiladi.
Bunday muvaffaqiyatlar ortida esa tizimli ish yotadi. Startup HUB BUT tashabbusi Puchon universitetining Toshkentdagi filiali rektori Agrippina Vasilyevna Shin tomonidan ilgari surilgan bo‘lib, u talabalarning innovatsion faoliyati va tashabbuslarini har tomonlama qo‘llab-quvvatlab kelmoqda. Start-up Hub faoliyatiga uning muallifi va koordinatori Kim Aleksey Stanislavovich rahbarlik qiladi hamda yosh ixtirochilarga g‘oyadan tayyor loyihagacha bo‘lgan yo‘lni bosib o‘tishda ko‘maklashadi.
Puchon universitetining Toshkentdagi filiali aynan shunday imkoniyatlarni o‘z talabalariga yaratib bermoqda. Bu yerda faqat ma’ruza va imtihonlar bilan cheklanib qolmay, startaplar yaratiladi, mentorlar bilan ishlanadi, loyihalar investorlar oldida himoya qilinadi va talabalar yuqori texnologiyalar hamda tadbirkorlik olamiga ilk qadamlarini qo‘yadilar.
Bugungi zamonaviy universitetni aynan shu jihat ajratib turadi: bu yerda bilim yakuniy maqsad emas, balki odamlar hayotini o‘zgartira oladigan loyihalarni yaratish yo‘lidagi boshlang‘ich nuqtadir.
Bugun to‘g‘ri tanlov qilishning ayni vaqti. Balki yaqin orada aynan sizning g‘oyangiz ham universitet devorlaridan tashqarida keng e’tirof etiladigan navbatdagi muvaffaqiyatli loyiha bo‘lar.