Kelajak dunyosi qanday bo‘lishi haqidagi bahslar davom etayotgan bir paytda, Toshkent shahridagi Puchon universiteti ushbu kelajakni bugun yaratishga kirishgan. Universitet yangi avlod texnologiyalari sari yana bir muhim qadam tashlab, Central Asian Association for Artificial Intelligence bilan hamkorlik memorandumini imzoladi.
Ushbu strategik hujjat nafaqat nazariy kelishuv, balki real loyihalar, ilmiy ishlanmalar va xalqaro tashabbuslarni o‘z ichiga oladi. Asosiy e’tibor sun’iy intellekt (AI) davrida muvaffaqiyatli faoliyat yuritadigan yuqori malakali mutaxassislarni tayyorlashga qaratilgan.
Bugungi kunda AI endi faqat kelajak haqidagi suhbatlar mavzusi emas. Sun’iy intellekt allaqachon ta’lim tizimi, mehnat bozori, iqtisodiyot va kundalik hayotga ta’sir ko‘rsatmoqda. Shu bois universitetlar, texnologik hamjamiyatlar va soha ekspertlari o‘rtasidagi hamkorlik zamonaviy raqamli muhit rivojining eng muhim omillaridan biriga aylanmoqda.
Bugungi kunda Central Asian Association for Artificial Intelligence mintaqadagi AI yo‘nalishida eng faol rivojlanayotgan platformalardan biri hisoblanadi. Assotsiatsiya IT-industriya, biznes, ilm-fan va davlat tuzilmalari vakillarini birlashtirib, ta’lim dasturlari, xalqaro konferensiyalar, AI-xakatonlar va sohaviy forumlarni tashkil etmoqda. Shuningdek, yosh mutaxassislar hamda tadqiqotchilar uchun yangi imkoniyatlar yaratmoqda.
Uchrashuv davomida Agrippina Shin sun’iy intellekt bugungi kunda kelajak texnologiyasi emas, balki jamiyat hayotining barcha sohalariga ta’sir qilayotgan eng muhim vositalardan biriga aylanganini ta’kidladi. Uning so‘zlariga ko‘ra, universitet global texnologik jarayonlarning faol ishtirokchisiga aylanish, iste’dodli yoshlarni qo‘llab-quvvatlash, ilmiy tadqiqotlarni rivojlantirish va zamonaviy ta’lim imkoniyatlarini yaratishga intilmoqda.
Rektorning ta’kidlashicha, Assotsiatsiya bilan hamkorlik qo‘shma ta’lim va ilmiy loyihalarni amalga oshirish, tajriba almashish hamda sun’iy intellekt sohasidagi ilg‘or yechimlarni joriy etish uchun mustahkam asos bo‘lib xizmat qiladi.
Imzolangan memorandum AI va raqamli texnologiyalar sohasida uzoq muddatli strategik hamkorlikni nazarda tutadi. Asosiy yo‘nalishlar qatorida qo‘shma ta’lim dasturlarini ishlab chiqish, ilmiy-tadqiqot va innovatsion loyihalarni yo‘lga qo‘yish, amaliy tadqiqotlar o‘tkazish, tahliliy materiallar hamda ilmiy maqolalarni chop etish bor.
Bundan tashqari, tomonlar xalqaro forumlar, texnologik konferensiyalar, startap tanlovlari va xakatonlarni birgalikda tashkil etishga kelishib oldi. Talabalar va professor-o‘qituvchilarni professional AI-platformalar hamda amaliy loyihalarga jalb qilishga alohida e’tibor qaratiladi.
Shuningdek, hujjatda talabalar, yosh tadqiqotchilar va ekspertlar uchun akademik almashinuv, stajirovka va amaliyot dasturlari ham ko‘zda tutilgan. Eng istiqbolli yo‘nalishlardan biri sifatida koreys texnologiyalari va ta’lim metodologiyalari asosida qo‘shma AI-laboratoriya, kompetensiyalar markazi yoki texnopark tashkil etilishi mumkin.
Yangi hamkorlik universitet uchun nafaqat qo‘shimcha xalqaro imkoniyatlar, balki ta’lim, ilm-fan va texnologiyalar birgalikda mintaqa taraqqiyotining yangi yo‘nalishini belgilaydigan zamonaviy innovatsion muhitni shakllantirish sari muhim qadam bo‘lib xizmat qiladi.
